The Municipality of Calaca

Ni: Tacing Lasheras, Lunas Kabatiran 

I

Sa ala-ala ko ay binabalikan

Ang may pitong taong, panahong nagdaaan

Mula noo’y nagsimula itong Pasko sa’ting bayan

Isang Paskong nanatili, hindi isang araw lamang.

II

Itong ating munisipyo, wari baga ay Belen,

Pagkat doon ay sumilang ang presensya ng Diyos natin

Ang loob ay punong-puno ng biyayang walang maliw

Kaningningan ng lumikha, Oh kay sarap-sarap damhin.

III

Itong ating Punong baya’y isang buhay na Santa Claus

Nakahanda na magbigay ng regalo, oras-oras

Ang lahat ng lumalapit, tinanggap na may galak

Walang pagod sa pagtulong sa paggawa’y walang kupas.

IV

Ang Pangalawang Punong baya’t mga halal na konsehal,

Mga bantay na kerubin na palaging nagmamahal

Nakahandang sumaklolo sa oras ng kagipitan

Laging handa sa pagtulong, naglilingkod kaninuman.

V

Yaong mga consultant ay nagsisilbi namang tala

Nagbibigay ng liwanag sa nahanap ng biyaya

Taglay nilang kaningningan ay nagtuturo sa madla

Nang daan ng katwiran na puno ng Pagpapala.

VI

Ang bawat departamento sa bayan kong minamahal

Ay ang buhay na Christmas Tree na sa ati’y tumatanglaw

Yaong mga manggagawa’y nagniningning na ilawan

Na doon ay nakasabit, nagbibigay kasiyahan.

VII

Mga Lunas Volunteers ay tulad ng mga parol

Na laging kagamit-gamit sa bayan man at sa nayon

Sa liblib mang mga lugar walang takot pumaroon

Walang tigil ang serbisyo, handa laging tumulong.

VIII

Nang isilang ang Mesias sa tabi Niya ay lumitaw

Ang isang malaking hukbo ng sangkalangitan

Sa paano’y ang layunin, katahimika’y bantayan

Sila yaong magigiting na pulis sa ating bayan.

IX

At ang ating unang Gng. na si Dr. Sharon Ona

Siya ang buhay at sariwa na bulaklak nitong Paskwa

Ang luntiang mga dahon at petals na mapupula

Sagisag ng pagkalinga, pagmamahal bilang ina.

X

Oh kaysarap na isiping dito sating bayan ngayon

Pasko na Araw-gabi hindi minsan ‘lang santaon

Simbulo ng kapaskuha’y hindi lamang dekorasyon

Kundi buhay at totoong gamit sa bawat panahon.

XI

Kaya naman halikayo, kababayang Calaqueño

Sa hapag ng sangguniang bayan, halina at makisalo

Masaganang Noche Buena, sadyang laan para sayo

Upang yaong kaunlara’y makamtan ng bawat tao.

XII

Itong ginto, ang kumonyon at ang mirong inihandog

Ito’y naging kagalakan sa puso ng ating Diyos

Ito‘y ang pinagsama-samang maka-Diyos na paglilingkod

Binalot ng Punong Bayan at sa Diyos ay inihandog.

Next >