The Municipality of Calaca

Panahon na naman ng eleksyon, marami na naman tayong kaibigan na gumagala sa mga bahay-bahay. Karamihan sa mga ito ay palakaway, palakamay at palaakbay. Lahat sila’y tila ba pinakamabuting tao na dapat ihalal at sa bawat pisil sa pagdampi ng kanilang mga kamay ay isang biyaya na dapat agad sunggaban. Sa mga tarhetang kanilang iniaabot kasama ang ilang pirasong kendi para sa mga botante ay pampalaway ay para bang nagsasabing kasing tamis nito ang  serbisyong  handang ibigay. Sa kanilang posters at campaign materials na sa mga pader, poste at punungkahoy ay nakasabit, nakasulat  walang kamatayang slogan ng partido pulitikal o mga nakalulululang pang-uri na naglalarawan sa kanilang adhika. Katabi ng mga ito nakabalandra nilang matamis na ngiti at sa ibaba nakasulat ngalan ng kandidato na para bang nagsasabing iboto mo ako problema mo’y mapapawi handang lingapin ang pusong sawi.

Samantala, meron din naman mapagsamantalang botante na sa mga kandidato walang ginawa kundi katasan. Kapalit ng isang boto, gusto niya’y kailangan lahat ibigay subalit ang totoo ganun din ang ginagawa humihingi ng pabor sa kabila. Ang iba sadyang boto ay ibinebenta kapalit ng kinang ng pera o kaya’y pabor na sa damuhong kandidato ay nakukuha kahit alam na  liko ang gawain niya at hindi man lang naisip na hindi siya lang kundi buong bayan o bansa ay magdurusa. Kung pansariling hangad lang ang iisipin ng bawat isa, siguradong hindi na matatapos paghihirap at kurapsyon sa bansa. 

Ano ba itong sistema ng pulitika sa ating bansa. Minsa’y nakakainis minsan din naman nakakatuwa, hindi na maintindihan kung sino dapat iboto at kanino dapat magtiwala. Nakakalito makinig sa kanilang mga plataporma dahil lahat ng kanilang sinasabi maganda at walang maipupula. Lahat ay gagawin habang panahon ng kampanya subalit karamihan ay hunyango na kapag sa posisyon ay nakupo na. Palalawigin ang koneksyon at sa proteksyon ay magtatamasa. Ganito na bang talaga ang nais nating mangyari? Kalimutan ang tama at magpakarahuyo sa buyo ng marami.

Sana naman ay hindi pa ganito ang marami dahil may natitira pa din na sa serbisyo ay tapat at handang maglingkod sa kababayan. Sila ang mga taong may magandang performance, low profile din ang ilan.  May ilan pa rin na pilit na iminumulat ang kababayan sa tama. Hinihimok na magbago ang kababayan para sa darating na henerasyon sila ay hindi mapahiya. Ngunit bakit nga ba kung sino ang may nagagawang tama at mabuti sa nasasakupan ay siyang umaani ng batikos at pangungutya? Marami parin sa ating mga kababayan na pikit ang mata at bulag sa katotohanan. Pilit na binubuhay ang utang na loob na walang kamatayan, pansariling nais laging pinagbibigyan at hindi maisip ang mas maraming makikinabang.

Sana naman ngayong darating na halalan sa Mayo, maging matalino at patas ang mamamayan sa pagboto. Huwag sana basta maniwala sa pangakong walang katiyakan at mga mata ay ituon sa nagdudumilat na katotohanan. Makapagbalik-tanaw sana sa sa mga nagawang magaganda ng kandidato upang bayan ay umunlad at hindi lang tingnan ay makukulay at malalaking tarpaulin na may kasamang pangakong pagbabago at pag-unlad. Manapa’y pakalimiing mabuti ang katuturan ng kanyang sinsabi. Huwag sana kaagad ay maniwala sa mga paninirang kabi-kabila at dapat sipin na lahat ito ay pakana ng mga taong wala namang kredibilidad at sa pulitika ay sira kaya pilit dinudungisan ang pangalan ng iba upang ng sa gayon ang simpatya ng tao sa kanya ay hindi mawala. Ang hindi niya lang alam sa kanyang mga ginagawa, kinakaawaan siya ng matatalinong botante na batid ang kanyang adhika. At sa halip na siya’y manalo lalo siyang naging kawawa. Kaya sana naman sa lahat ng political aspirants ay lagi itong tatandaan, “Politics is not by choice, never just a dream, it is a commitment to serve with the willingness to sacrifice and striving for excellent public service”.