The Municipality of Calaca

Makasaysayang pagwawagi ang ipinamalas ng buong tiket ni Mayor Nas Ona at Vice Mayor Larry Atienza sa   ginanap na kauna-unahang automated polls sa bansa noong Mayo 10 taong kasalukuyan. Matagumpay na nasungkit ng grupo ang 10-0 kontra sa pinagsanib na puwersa ng partido Liberal at Nacionalista.

Nakakuha ng 21,759 na boto si Mayor Nas Ona na siyang nagpatumba sa kanyang  katunggaling si Marlon Hernandez na may kabuuang boto lamang na 13,029 at naungusan ng una ng  8,730 na boto. Samantala, nasungkit ni Vice Mayor Larry Atienza ang ikatlo niyang termino bilang Vice Mayor sa kanyang nakuhang 17,038 boto kumpara sa 16,833 boto kay Dra. Agnes Katigbak, dating katunggali ni Mayor Nas sa pagka-punumbayan noong Halalan 2007 at maybahay ng dating punumbayan Jerry Katigbak.

Nagbunyi rin ang 8 konsehal ng partido dahil sa nakuhang puwesto. Nanguna si Kon. Anselmo Macalindong sa botong 19,592at pinangalawahan ni Kon. Prima Dajoyag sa botong 19,156. Umakyat naman sa ikatlong puwesto si Kon. Deovic Ontangco sa kanyang kabuuang boto na18,844 habang nanatili sa ikaapat na puwesto si Kon. Chito Macalalad sa botong 18,575. Sa bilang na 17,801 boto nakuha ng Kon. Niño Glenn Matulac ang ikalimang puwesto. Napanatili ni Kon. Robenson Sale ang kanyang ikaanim na puwesto sa botong 17,335 na sinundan ni Kon. Brigido Casanova sa pampito at botong 16,691. Samantala, “huli man daw at may asim mananalo pa rin!” ‘Yan ang sigaw ng nag-uumapaw na damdamin ni Kon. Robert Salazar matapos siyang iproklama  bilang pangwalong miyembro ng Magnificent 10 sa botong 15,544.

Isang makasaysayang pangyayari ang naganap na halalan sa bayan ng Calaca bunsod  ng mga  kahanga-kahangang naging kaganapan dito. Una, ang pagkakatala ng kauna-unahang punumbayang nahalal ng tatlong sunud-sunod na termino. At ikalawa ang pinakamataas na tala ng boto na nakuha ng partido na siyang  dahilan upang ideklara ang taguring 10-0 sa buong bayan at sa 16 na barangay na kinabibilangan ng mga Barangay ng Niyugan, Bambang, Balimbing, Cahil, Lumbang na Bata, Lumbang na Matanda, Matipok, Makina, Bisaya, Salong, Taklang-Anak, Loma, Poblacion 2, Poblacion 4, Baclas at Munting Coral.