The Municipality of Calaca

Muling ipinakita ng mga debotong Calaqueño ang pagkakaisa sa ginanap na Istasyon ng Krus noong ika-1 ng Abril, 2010. Kagaya ng taunang kaugalian, tuwing panahon ng kwaresma o Mahal na Araw, sinimulan ang banal na gawain sa pamamagitan ng pagtitipun-tipon sa bulwagan ng pamahalaang lokal ganap na ika-4:00 ng umaga. Kasunod ang pagbagtas mula sa unang istasyon sa nasabing lugar ng pagtitipon hanggang talaytayin ang kahabaan ng barangay Madalunot patungong barangay Matipok upang tahakin ang labing apat (14) na istasyon. Isinagawa ang pambungad na panalangin sa unang istasyon sa pamumuno ni Rev. Fr. Emiliano Magsino gayun din ang mga panalangin sa bawat istasyon at pag-awit ng mga naaangkop na awiting para sa kwaresma. Halos wala nang puwang ang daanan sa dami ng taong nakiisa at sumama kabilang ang iba’t ibang organisasyong pangsimbahan, pansibiko, pampribado at pampubliko. Ang paglalakbay ay pinangunahan ng mga opisyales ng lokal na pamahalaan sa pamumuno ni Mayor Nas Ona, Vice Mayor Larry Atienza, mga miyembro ng Sangguniang Bayan (Magnificent Seven) at kawani ng lokal at nasyunal na pamahalaan.