The Municipality of Calaca

Dinagsa ng mga supporters ng LAKAS-KAMPI-CMD ang proclamation rally na isinagawa ng partido sa bayan Calaca noong nakaraang Marso 27, taong kasalukuyan. Tinatayang  mahigit kumulang limang libong supporters ni Mayor Nas Ona at Vice Mayor Larry Atienza at buong partido ang nagkatipun-tipon sa activity area ng lokal na pamahalaan bilang suporta sa buong tiket.

Malakas na sigawan mula sa manonood ang tanging naririnig sa tuwing tutugtog ang campaign jingle ng partido habang iwinawagayway ang mga orange flaglets. Subalit mas mainit na pagtanggap ang nasaksihan matapos isa-isang tawagin ni Kgg.Nemesio “Boy” Casanova, Chairman ng LAKAS-KAMPI-CMD sa bayan ng Calaca ang kumpletong line-up ng mga kakandidato sa susunod na election na sinimulan sa mga magiging konsehal ng bayan na sina: Casanova, Brigido; Dajoyag,Prima; Macalalad, Luis; Macalindong, Anselmo; Matulac, Niño Glenn; Ontangco, Deovic; Salazar, Robert at Sale, Robenson. Pinakamalakas  na palakpakan at hiyawan naman nang tawagin ang tambalan nina Mayor Nas Ona at Vice Mayor Larry Atienza sa entablado at hawak kamay ang grupo habang walang tigil na tinutugtog ang jingle. Dumalo din sa okasyon ang dating Exec. Sec. Eduardo R. Ermita na aspiranteng bumalik bilang kongresista ng unang distrito kasama si outgoing Congresswoman Eileen Ermita-Buhain na nagpahayag ng patuloy na kaunlaran sa  kanlurang Batangas sa pagbabalik ng ama sa posisyon. Kasama rin ng grupo ang kakandidatong Bokal ng Partido sa unang distrito, Arnel Salas. Buong suporta din ang ipinakita ng 27 kapitan ng barangay na kaanib ng partido sa pamumuno ni ABC Pres. Orlando E. Noche ganun din si SK Federation Pres. Emilyn Alcazar.

Sa talumpati ng sampung kandidato sa lokal na posisyon, nadama ng mga manonood ang kasiguraduhan ng pag-unlad sa bayan ng Calaca sa susunod na tatlong taon. Naging madiin ang mga pangungusap ni Vice-Mayor Larry Atienza sa kanyang pananatili sa puwesto. Inilalahad niya ang kanyang naging mahalagang ambag bilang ama ng Sangguniang Bayan na siyang susi kung bakit patuloy na naisasagawa ang mga programa ng punumbayan. Samantala, hinangaan naman si Mayor Ona dahil sa kanyang mga sinabi na siya sampu ng kanyang tiket kailanman ay hindi mangangako ng anumang bagay sa kanyang kababayan. Aniya, hindi siya mangangako dahil noong mga nakaraang eleksyon, hindi naman niya ipinangako na magkakaroon ng barangayan program at vegetable productions. Ganun din hindi siya kailanman nangako na magpapatayo siya ng maladambuhalang munisipyo na walang utang subalit lahat ng ito ay nagkatotoo.Tinalakay din ng punumbayan ang tungkol sa susuportahan niyang gobernador. Binigyang-diin niya na ang kandidatong gobernador na kanyang susuportahan ay ‘yung tapat dahil siya ay boy scout. Higit sa lahat susuportahan niya ang kandidatong pagka-gobernador na susuporta sa buong tiket ng kanyang partido. Dagdag pa niya, hanggang sa kasalukuyan ay nakikipag-ugnayan pa rin sa kanya si dating gobernador Armand Sanchez ganun din si Gov. Vilma Santos-Recto na alam niyang ginagawa nila ito dahil alam ng dalawa na ang kanyang tiket ay buo at kung sinumang kandidatong gobernador na dadalhin ng kanyang partido at tiyak na panalo sa bayan ng Calaca.